چاغداش اینسان حیاتی‌نین بیر چوخ تظاهورلری آیدینلانما دؤوروندن سونرا آوروپادا اینسان مرکزچیلیک و اؤزنه‌گیلیگه گؤره ديیشدی. رنسانس دؤورونون طبیعی سونوجو اولاراق و اؤزجولوگون سؤنمه‌سی ایله «دؤولتین اوتوکراسی‌سی» و «سلطنتین ایلاهی حوقوق»، اولماسی کیمی قاوراملار سیاست آلانیندا سورغویا چکیلمیش و حؤکومتلرین نییه و نئجه اولدوغونا دایر یئنی یاناشمالار اورتایا قویولموشدور. چاغداش توپلوملاردا بوتون اینسانلار وطنداش ساییلیر و «مجبور» اولماق یئرینه، ایندی «حوقوق» صاحبیدیر.
دوشونجه آلانیندا باش وئرن بیر سیرا گلیشمه‌لر و چوخ‌سایلی اینقیلاب و مدنی گلیشمه‌لر دونیادا سوسیال، علمی و اقتصادی قالخینمانین اساسینی قویدو. باخمایاراق کی، باشلانغیجدا بو توپلومسال حرکاتلارین بیر چوخو زوراکیلیقلا موشایعت اولونوردو و چوخلو سایدا تاریخی نومونه‌لر واردیر، مثلا، فرانسا اینقیلابی، الجزایر اینقیلابی، چین اینقیلابی، وییتنام ساواشی کیمی نومونه‌لر. بونلار گؤستریر کی حؤکمرانلیغینا قارشی جدی موباریزه آپارماغین تک یولو زوراکیلیق ایدی. آنجاق سون اونیللیکلرده بیز بو ساحه‌‌‌ده توتومون ديیشمه‌سی‌نین شاهیدی اولدوق کی، بو دا اونو گؤستریر کی، بوتون دونیادا چوخلو سایدا یئنی سیویل دیرنیش گئنیش اولاراق یاییلمیش و تاریخی، زوراکیلیق‌سیز بیر فورما طرف آپاریر. اساسا دئیه بیلریک کی، ایندییه‌دک بؤیوک زوراکیلیق‌سیز حرکاتلار دونیانین اونلارلا اؤلکه‌سی‌نین سیاسی منظره‌سینی دییشیب.
آوروپادا ائیتیم آلماق، چاغداش دؤورده باتی دونیاسی‌نین گلیشمه‌سینه آشینا اولماق کیمی عامللر «ایرانلیلارین اویانماسینا» سبب اولموش و «مشروطه حرکاتی» کیمی اؤنملی حرکاتلارین باشلاماسینا نه‌دن اولموشدور. بو حرکاتلار چوخ واخت سیاسی مقصدله اوتوریتر سیستملره قارشی موباریزه آپاریردیلار. بو باخیمدان، سونرادان «۱۳۵۷ اینقیلابی»، «یاشیل حرکاتی» و «قادین، حیات، آزادلیق»، حرکاتی کیمی زوراکیلیق‌سیز حرکاتلار دا ایراندا مدرنلشمه سورجی‌نین و دموکراسینین یارادیلماسی چابالاری‌نین داوامی ساییلا بیلر.
حاضردا بیز بوتون دونیادا آرتان اتوریترلیگین ناراحات‌ائدیجی یئنی دالغاسی‌نین شاهیدی اولوروق. اوتوریترلیگه دوغرو بو گئدیش بیر چوخ خالق حرکاتلارینی دموکراسی و اساس اینسان حاقلارینی ساوونماق اوچون آیاغا قالخماسینا نه‌دن اولوب. آیریجا، تکنولوژی‌نین حیاتدا و دیجیتال اوتوریترلیگین آرتماسیندا رولو، اکولوژی بؤحرانلارلا یاناشی ایکی‌قات ناراحاتلیق دوغورور. گؤرونن اودور کی، بیلگی تکنولوژیسی چاغی، اینترنت و سونی زکا دؤورو توپلومسال ایله‌تیشیمی فرقلی و بعضاً داها گوجلو فورماسینی یاراتسا دا، اتوریتر گوجلر عینی واسطه‌‌‌لردن سیاسی موخالیفتی ایزله‌مک، اونلارا نظارت ائتمک، انگل‌له‌مک، بیر طرفلی ایچریک یایماق یولو ایله خالق حرکتلرینی ائتکیسیز حالا گتیرمک اوچون ایستیفاده ائدیرلر.
بئله بیر دورومدا و اتوریتر گوجلره قارشی بیلگیلندیرمه اینسانلار و دموکراسینین دستکلنمه‌سینده اؤنملی رول اوینایاجاق. اونا گؤره ده بو قورولوش زوراکیلیق‌سیز حرکاتلار ساحه‌‌‌سینده چاغداش و اعتبارلی قایناقلار و آراشدیرمالاردان ایستیفاده ائده‌رک، اونلارین فلسفه‌سینی، اؤزللیکله ده فارس دیلی آنلایانلارا تقدیم ائتمکله بو سؤیلمین دینامیکلرینه یاردیم ائتمه‌یه چالیشیر.
اساساً ۱۳۵۷-جی ایل اینقیلابیندان سونرا دوغولان، دیجیتال حیاتین و توپلومون قلوباللاشماسی‌نین فایدالاری ایله یاشایان و مسئله‌‌لره یئنی باخیشلا یاناشان گنج قورشاغین فیکیر و باخیشلاریندان ایستیفاده ائدیلمه‌سی بو قورولوشون اساس ایلرله‌مه قوه‌سی اولاجاقدیر. بونونلا بئله، یولوموزو دایم ایشیقلاندیراجاق بو ساحه‌‌‌ده تجروبه‌لی اوزمانلارین فیکیرلریندن و دونیاگؤروشلریندن ده ایستیفاده ائده‌جییک.
بیلگیلندیرمک، خبرلرین ایشیقلاندیریلماسی، مقاله و آراشدیرمالارین حاضرلانماسیندا اساس دقتیمیز صداقتی قوروماقدیر. چونکی بیز یاخشی بیلیریک کی، ایران سیویل توپلومو ایللرجه حیله، آلداتما و یالانلاردان، شیشیرتمه‌لردن، کئچیجی هیجانلاردان، آخماقلیقدان و عوام شوعارلاردان یورولوب. بیز ده چالیشاجاغیق کی، تقدیم ائتدیگیمیز ایچریکلر هم نظری اولاراق فایدالی اولسون هم ده آراشدیرماچیلار اوچون فایدالی اولسون و توپلومون چوخلو کسیمینی قاپسایاجاق پراقماتیک و پراکتیکی یؤنلره صاحب اولسون.
اومید ائدیریک کی، چابالاریمیز ایرانلیلارین سیویل توپلومونا کیچیک ده اولسا یاردیم ائده‌جک و ان آز زوراکیلیقلا ایران اوچون پارلاق گله‌جک قورماق اوچون فایدالی اولاجاق.
